प्रदेशहरूमध्ये युवा तथा खेलकुदका लागि सबैभन्दा धेरै बजेट बागमती प्रदेशले छुट्याएको छ । बागमती प्रदेशले आगामी आर्थिक वर्ष २०८२र८३ को बजेटमा खेलकुदका लागि १ अर्ब १६ करोड विनियोजन गरेको छ ।
बागमती प्रदेशको कुल बजेट ६७ अर्ब ४७ करोड ७३ लाख २७ हजार रुपैयाँको रहेको छ । जसमा युवा तथा खेलकुदतर्फ एक प्रतिशत भन्दा बढी बजेट छुट्याइएको हो ।
बागमती प्रदेशमा युवा तथा खेल गतिविधिहरूलाई प्रवर्द्धन गर्न आगामी आर्थिक वर्षमा खेलकुद नीति जारी गरी कार्यान्वयन गरिने र खेलकुद प्रतियोगिताहरूको वार्षिक क्यालेन्डर निर्माण गरी सो अनुसार खेलकुद प्रतियोगिताहरू सञ्चालन गरिने बजेटमा उल्लेख गरिएको छ ।
युवा तथा खेलुकदमा अघिल्लो वर्षभन्दा ४२ करोडले बढी बजेट विनियोजन भएको हो ।
संघीय सरकारसँगको सहकार्य तथा साझेदारीमा स्मार्ट स्पोर्ट्स सिटीको अवधारणा अनुसार ललितपुरको गोदावरीमा अन्तर्राष्ट्रिय बहुउद्देश्यीय रंगशाला निर्माण कार्य अघि बढाउन ९ करोड बजेट विनियोजन गरिएको छ ।
बागमती प्रदेश सरकार र भरतपुर महानगरपालिकाको सहलगानीमा निर्माण भइरहेको अन्तर्राष्ट्रिय क्रिकेट रंगशालाको लागि ९ करोड बजेट विनियोजन गरिएको छ ।